اسفنجة الصحون .. عن النظافة في المطبخ

مساء الخير

النهارده كلامي عن حاجه كلنا بنستعملها , وبترتبط بصحتنا بشكل مباشر

كلامي عن منتجات تنظيف الاطباق

اسفنجات او ليف او سلك

اول حاجه لازم نعرفها ان الحاجات اللي بنغسل بيها الاطباق

 ماينفعش نغسل بيها اي حاجه تانيه وبعدين نرجع نستخدمها للاطباق تاني

مانغسلش بيها البوتجاز

مانغسلش بيها الحوض

مانغسلش بيها السيراميك

ولو غسلتي الحاجات دي بادوات تنظيف الاطباق

 يبقي بعد ما تستخدميها تترمي فوراً فوووووراً

تاني حاجه الافضل ان يكون فيه اسفنجتين

 واحده تغسلي بيها الكواب وواحده تغسلي بيها الاطباق والحلل

والحاجات اللي بتطبقي فيها او بتستخدميها عموما في الطبيخ

ليه ؟؟

لان الاطباق والحلل والمعالق ... الخ هيبقي فيها بقايا اكل

 وريحة الاكل هتلزق فيها ماينفعش تغسلي بيها اكواب زجاجيه

 لان الريحه هتلزق كمان الفطريات والبكتريا اللي جت 

ع الاسفنجه هتتنقل للاكواب

ممكن تستخدمي الاسفنجه الصغيره للاكواب

والكبيره للاطباق والحلل

الاسفنج والسلك اللي بنستخدمه مايتسابش في مياه ولا يتساب فيه بقايا اكل بعد الاستخدام , اغسلي الاسفنج والسلك بعد كل استخدام  كويس ويفضل الغسيل يكون بمياه ساخنه

بعد الانتهاء من الاستخدام اليومي يفضل نقعها في عصير ليمون لتقليل البكتريا اللي اتنقلت ليها عن طريق الاواني

اخيراً الاسفنجه والسلك لازم يتم تغييرهم اسبوعياً , مش تستني لحد ما الاسفنجه تتقطع ولا لما السلك يدوب , غيريها اسبوعياً لان بعد كده البكتريا والفطريات هتزيد وماحدش عايز يمرض , وطبعا ماينفعش نعمل كل ده من غير ما ننضف الحاويه اللي بنحط فيها الاسفنجه والسلك , اغسليها كل يوم بمياه سخنه ومعقم زي ديتول مثلاً

بتمنالكم صحة دائمة :)

الصن بلوك افضل ولا الصن سكرين

كلنا بنسمع عن اشعة الشمس الضاره وبعضنا الشمس اذته , وبرضه كلنا بنسمع عن اننا لازم نحط واقي من الشمس قبل ما ننزل

طب فيه نوعين من واقي من الشمس 

فيه صن بلوك وصن سكرين , اختار اي واحد فيهم ؟؟؟

عشان تعرفي تختاري اي واحد فيهم لازم تعرفي الفرق بين الاتنين

باختصار عشان ماضيعش وقتكوا

اولاً الصن بلوك  Sun block

  بيكون حاجز على البشرة وبيعكس  كل الأشعة من على البشرة زي كريمات الزنك أوكسيد او كريم سودو كريم 

طيب ايه المشكله في الصن بلوك ؟؟

اولاً لما نحطه بيسيب اثر ع البشره , كانك حاطه كريم اساس, بيبان جدا وبيبقي شكله مجير

ثانياً مفعوله مش مستمر , يعني لو لمستي وشك بأي شكل , او حطيتي نضارة شمس هتلاقيه طلع من المكان اللي لمستيه او حطيتي عليه النضاره , يعني مش ثابت , بالتالي مفعوله بيروح

ثانياً الصن سكرين Sunscreen

مخصصة لانها تتفاعل مع خلايا البشره , لو مسحتيها بايدك مش هتتمسح , لو لبستي نضارتك مش هتتشال من علي بشرتك , بالتالي مفعوله بيفضل موجود

طيب ايه الافضل

لو حد نازل يجيب حاجه من سوبر ماركت او يجيب حاجه من العربيه او يشتري اي حاجه من اي مكان قريب فممكن تستخدموا الصن بلوك عادي لو حابين  لكن ينصح بالصن سكرين اكتر , وطبعا اي مشوار بعيد شغل زيارات اي حاجه فيها وقت وخصوصا في البلاد اللي درجة الحراره فيها مرتفعه طبعا الصن سكرين هو الاختيار الافضل

بيبي ليس ولا سيشوار سيشوار ولا بيبي ليس , وليه؟

ايوووووووووه انا عارفه انه سؤال بيتسأل كتير ,انا بقي هضربلك السؤال ده كله





ده سؤال غلط

ايوووووووووووون ماتبحلقيليش كده خضتيني , اه ده سؤال غلط

قولتيلي ليه بقي ؟

هقولك بس ركزي معايا بقي

اصلا مافيش مجال للمقارنه بين السيشوار ومكواة البخار





دلوقتي السيشوار شغلته اصلا ايه ؟؟

شغلته ينشف الشعر ويفرده شويه , ازاي ؟؟

بانه يوزع الهوا علي شعرك فينشف او يندي وبعدها يتفرد لما تستخدمي الفرشاه صح ؟؟



طيب المكواه شغلتها ايه ؟؟

شغلتها تكمل باقي الفرد لشعرك وتعملي بيها الاستايل اللي انتي عايزاه لشعرك




طب والبيبي ليس البخار دي بتعمل ايه ؟؟

دي يا ستي بتعمل اكبر كارثه انتي بتسببيها لشعرك

لانك بتخلي شعرك يستحمل البخار بشكل مركز وده بيكسر الشعرايه

وبيقصفها علي المدي البعيد وبعد فتره من الاستعمال حسب ما شعرك يتحمل



طب وايه الفرق بقي بين السيشوار والبيبي ليس ؟؟

السيشوار ده هوا سخن , انتي بتقدري تتحكمي في درجته , مابيبقاش مركز بشكل مباشر

علي الشعر لانك بتستخدميه من علي بعد معين مابتحطيش فوهة السيشوار علي شعرك مباشرة

البيبي ليس ده بخار بتركزيه علي الشعرايه بشكل مباشر والنتيجه بتكون تقصيف

وتكسير تلاقي الشعرايه مقسومه اتنين وفي الاخر هتلاقي وقوع للشعر

لأنك تقريبا بتحرقيه في كل استخدام



طب يا ستي الكلام ده بتقوليه علي اي اساس ؟؟؟

اقولك


الكلام ده قاله خبراء في الشعر , وانا بحاول اتابع عشان استفيد

خصوصا البرامج الاجنبيه وحتي ع اليوتيوب الاجانب العاديات متلاقيش ابدا واحده
من البنات الاروبات دول اللي بيعرفوا يعملوا كل حاجه بتستعملها

وحتي اسامه درويش من اكبر مصففين الشعر في مصر قال ان بوظان الشعر بدأ

مع نزول الاختراع ده للأسواق , ده اولا

ثانياً انا جربت الاتنين لأن انا عارفه اننا بنستسهل

وفعلا لقيت السيشوار هو الأساس , البيبي ليس ع الشعر المبلول دي دمرتلي شعري

تقدري تسشوري شعرك وتسيبيه من غير ما تعملي مكواه

وهيبقي مفرود وزي الفل , اتعلمي زي ما اتعلمتي تكوي

والمكواه مش هتترمي برضه فيه ناس بتحب تدي شعرها نص سيشوار كده

او سيشوار اي كلام يعني مش مفرود ع الاخر وتتفنن بالمكواه بعدها وتفرد براحتها , شغال برضه



ملحوظه : الكلام ده مش معناه ان السيشوار مالوش اضرار
لا طبعا لو استخدم غلط او زياده عن اللزوم برضه له اضرار
يعني الاتنين ليهم ضرر , بس ضرر السيشوار اخف من ضرر مكواة البخار


ملحوظه كمان , بقدر الامكان هاتي ماركه انتي عارفاها
سواء سيشوار او مكواه عشان يبقالها ضمان وتوكيل

ملحوظه اخيره , اللي لسه هتجيب سيشوار , ماتجيبيش اقل من 2000 وات

ده لو شعرك معقول , انما لو شعرك كيرلي اوي او خشن يبقي هتحتاجي حاجه اقوي

لان اقل من كده هيتعبك وهياخد وقت طويل ومش هيفرد كويس , دي تجربه من تجاربي الكتير


واللي لسه هتجيب مكواه , طبعا هاتيها عاديه للشعر الجاف
وهاتيها 230 درجه ودي مناسبه جدا , مش هتستخدمي الدرجه دي
هتستخدمي اقل الا لو كان شعرك خشن جدا بس يبقي عندك درجات كفايه
عشان تثبتي المكواه علي درجه تناسب شعرك

وكمان ما تجيبيش العريضه لو بتحبي تغيري وتعملي كيرلي
عشان تقدري تعملي ليس وكيرلي
حتي لو عندك او هتجيبي مكواه للكيرلي , الكيرلي بتاع المكواه العاديه
تقدري تعملي بيه اشكال تانيه للكيرلي هيبقي حلو جدا

وطبعا ماتنسوش الترطيب قبل واثناء وبعد ما تعملي شعرك

وخدي باااااالك

اللي يزيد عن حده ينقلب ضده , ماتسرفيش في عمل شعرك وسيبيه يرتاح


وطبعا اي حد عنده اي سؤال ماتترددوش , انا موجوده ممكن تسألوني هنا او ع البيدج او علي تويتر او علي جوجل


اشوفكوا في موضوع تاااااااااااااااااني

حاجات لازم تعرفيها عن فرشاة تنظيف الوجه

عندك فرشاة تنظيف الوجه اللي ببطاريه ؟

طب ماعندكيش وناويه تشتري ؟

يبقي اقري الموضوع ده

اولا قبل ما ندخل في الموضوع

عاوزه اقولكوا ان اي معلومه هقدر اجيبهالكوا 

عن اي حاجه بتكلم فيها هجيبهالكوا

عشان كده قبل م اقولكوا اللي لازم تعرفوه عن الفرش 

 لازم اقولكوا الاول انواعها

 فيه اكتر من نوع من الفرش لتنظيف الوجه , اشكالها وانواعها

 وطريقة عملها مختلفه

والفرشاه دي ليها تاريخ مع البنات والسيدات

فيه اليدويه , اللي انتي بتستعمليها بايدك عن طريق انك

 تحركي ايدك بالفرشاه علي وجهك

وده كان شكلها زمان

اما دلوقتي فشكلها تطور شويه وبقي منها عدة اشكال زي الاشكال دي

وفيه بقي نوع جديد بقاله كام سنه بيشتغل بالبطاريات وبرضه لها اشكال كتير 

زي كده

وفيه كمان فرش بيببقي معاها قطع غيار تانيه يعني الفرشاه بتتخلع

 وممكن تركبي مكانها قطعة للتدليك او غيره زي كده مثلا

والفرش اللي من النوع ده مابتبقاش للوجه بس

لكن بيبقي فيها قطع غيار للجسم كمان زي ما انتوا هتلاحظوا

بالنسبه للانواع ففيه انواع لا تحصي من الفرش

فيه كمان شركات تجميل وعنايه بالبشره

 زي جارنييه اونيتروجينا او غيرهم

انتجوا فرش زي دي عشان تستعملوها

 مع المنتجات التجميليه زي 

السنفره او الكلينزر وخلافه

ليكي حق اختيار اي نوع تحبيه

 طالما انك واثقه ان النوع اللي اخترتيه كويس

نيجي بقي للمهم اللي انا اصلا عملت الموضوع علشانه

اولا:

لو محتاره تجيبي فرشاه يدويه ولا اللي بتشتغل بالبطاريه

 هقولك اختاري اللي بتشتغل بالبطاريه

هتقوليلي ليه

هقولك لانها بتشتغل بشكل اتوماتيكي طالما مشحونه بالبطاريات

يعني مش هتتعب او هتكسل تشتغل كويس زي ما ايديكي ممكن تتعب او تكسل

بالتالي هي هتنضف اكتر واعمق بكتير من الفرشاه اليدويه

ثانيا :

الفرشاه اللي بتشتغل بالبطاريه بتتحرك في الدقيقه الواحده بعدد معين , يعني هتنضف اسرع ما انتي تنضفي بايدك

ثالثا :

ممكن تستخدميها مع السنفره " الاسكراب " زي ما قولنا قبل كده فهتلاقي الجلد الميت بيتشال افضل ما تحطي انتي الاسكراب وتدعكي بايدك او بفرشاه يدويه , واكيد انتي عايزه الجلد الميت يتشال بافضل ما يكون

رابعا :

لانها سريعه وقويه وبتنضف بعمق بالتالي كل الشوائب اللي في وجهك او معظمها علي الاقل هيخرج

بالتالي المسام الواسعه هتقل بشكل كبير ومن خلال الانتظام في الاستعمال ممكن تختفي خالص

خامسا :

لو انتي من الناس اللي مابتعرفش توزع الكريمات علي وشها كويس 

فالفرشاه دي وسيلة مساعده عظيمه ليكي , ممكن تحطي عليها كميه مناسبه من الكريم وتشغليها علي وجهك وهي هتوزعلك الكريم كويس

سادسا :

اي حاطه بتتحرك في وجهك سواء فرشاه بالشحن او يدويه او حتي صوابعك لما تدلكي وجهك

فهي بتحرك الدوره الدمويه 

سابعا :

تقدري تستخدميها مع مزيل الماكياج
لضمان ازالته بالكامل

كده قولتلكم عن مزاياها ؟؟ تعالوا نقول المحاذير بقي

اولا :

مش مناسبه للبشره الحساسه او اللي عندهم اكزيما او حب شباب ..الخ

لانها قويه وسريعه وده ممكن يسبب ضرر للبشره المهيئه للضرر ده

ثانيا :

لو هتستعمليها مع سكراب , اي سكراب او اي منتج بيشيل الجلد الميت

يبقي اقصي استخدام ليها مع المقشر ده مره واحده في الاسبوع

ثالثا : 

الناس اللي بتعمل تقشير كيميائي او ليزر ... الخ

بتكون بشرتهم حساسه جدا , مش مفروض يستعملوا الفرشاه دي

 الا لما الدكتور اللي بيتابعوا معاه يقولهم ان بشرتهم اصبحت مستعده لاستخدامها

بس يا ستي 

الموضوع كده خلص 

اي واحده عندها اي سؤال ماتترددش
ياريت لو الموضوع عجبكوا تنشروه :-*

واقابلكوا في موضوع جديد ان شاء الله

أهلا بكم

لم أكن يوماً من المهووسات بالموضة , ولكن أعلم جيداً ان اهتمامي بمظهري يعكس شخصيتي

لهذا قررت ان اكون الفتاة الأنيقة دائماً .. الفتاة التي لا تسعي للتقليد الأعمي .. الفتاة التي تختار ما يناسبها

قررت أن اكون الفتاة الجديدة التي ستهتم بنفسها من الداخل والخارج .. دون هوس :)

انتظروني مع تجارب ونصائح وعرض لمشترواتي

سنتعلم سوياً كيف نهتم بملابسنا ونختار ما يناسبنا .. كيف نهتم بالشعر والبشرة والماكياج ..

 كيف نهتم بأجسادنا من الداخل ونتعلم ان نأكل طعاماً صحياً دون الاحساس بالملل او الجوع

تذكري .. نجمات السينما والغناء لسن من الفضاء ولسن اجمل منك .. هن مجرد نساء عاديات تقابلهن نفس مشاكلك

ولكنهن تعلمن كيف يهتممن بمظهرهن :)

وتذكري ... لا توجد فتاة قبيحه , فقط توجد فتاة لا تعرف كيفية الاهتمام بنفسها ..


تابعونا

Ё₥Ψ